كان يا مكان اليوم وأنا بتاكسي…

على الصبح وكعادتي ركبت تاكسي وحكيتله “على الدوّار الثالث” . بس اللي لازم تعرفو انّي لمّا دخلت قلتلّه السلام عليكم! والظاهر انّها كلمة سحرية متعارف عليها بين سوّاقين التاكسي. يعني يمكن لو ما حكيتها كان السوّاق اعتبرني فاسقة وريّحني من لسانو.

أنا: ما حكيت اشي بعد السلام عليكم بس عطست! وحكيت بصوتي الواطي الحمدلله
التاكسي: يرحمك الله (بحماسة مش عارفة ليش) وبسرعة مد ايدو يبعبش بين الأغراض على بكيت الفاين.
أنا: يهدينا ويصلح بالكم وصرت أتفرّج عليه وهو عاجق حالو
التاكسي: خدي ياختي (يعني خذي يا أختي في الاسلام). شايفة؟ يعني لو مسيحي، المسيحية بفهموش هدا الحكي، تحكيلو يرحمك الله بعرفش شو يرد، ما عندهم هالشغلة

أنا بعقلي: يييييي علينا! الله يعدّي هالتاكسي على خير
أنا: لأ عندهم، حتّى المش متدينين بحكوا “bless you” يعني فليباركك الرب بالعربي (طبعا أنا صرت أضحك على حالي يعني هو شو فهمو بليس يو ما بليس يو؟ وقال بترجملو اياها زي الصب تايتلز)

التاكسي: يعني قديش مر علي هاي انت أول حدا بسمع منّو هالحكي هاد، هديك المرة على هدا الكرسي (ولمس الكرسي بايدو للتأكيد) طلع معي قس! (يعني ما كنت بدّي أحط بذمتي بس مبيّن الكذب) وعطس والله ما عرق شو يرد عليّه!

أنا صافنة

التاكسي: بعدين المسيحيّة أصلا بيوخدو من الاسلام، لانّه أصلا شو هو كتابهم يعني 50-70 بالميّة منّه مهو محرّف آآآه؟ (طبعا مش رح أضل أكتبلكم آآه بس هو كان بعد كل جملة يحكيلي آآه ØŸ ولمّا أطنشوا يحكيلي لدّي عليّ) يعني بطلع معي القس فلان الفلاني (أظن اشي الحدّاد حكى) من السلط من عنّا صار يحكي حكي قلتلّو بتعرف انّو هاي كلها أحاديث شريفة؟ يم نفسها بحكيها. أقسم بالله انّه حافظ آيات قرآنية أكثر من الانجيل. ليش؟ آه ØŸ قولي معي! لانّه القرآن ربنا حكى “انّا نحن نزلنا الذكر وانّا له لحافظون” مش بالكتابة!! لأ بالصدور. ولاد صغار خاتمين القرآن كلّه

أنا بعقلي: خلللللللللللللللللللللللللللص! مشان الله! فهمنا انّك مسلم وأنا مسلمة شو بدّك تثبتلي يعني؟

سكت التاكسي شوي وعلّي صوت القرآن على الراديو الحمدلله، وانا هبلة بضل أنسى انّه سواقين التاكسي ايمتا ما انفتحوا ما بسكتوا…
سواق التاكسي رجع تدريجيّا يزت حكي ويخلطه مع آيات حافظها وفجأة بعرفش كيف حكالي هاي القصة اللي أعتقد الها دخل بالآية الكريمة : “لتجدن أشد الناس عداوة للذين آمنوا اليهود Ùˆ الذين أشركوا ولتجدن أقربهم مودة للذين آمنوا الذين قالوا انا نصارى ،ذلك بأن منهم قسيسين Ùˆ رهبانا وأنهم لايستكبرون” لأنه سمعلي اياها:

-مرّة طلعت معي بنت صغيرة، بتفهمش شو مفهما البنت، ركبت قدّام (بعدين والله أعلم فكّر وقرّر يضيف ناس تانيين للقصة) وامها بتشتغل مدرسة وين؟ بدير. وركبوا ورا مع الام ولاد صغار. يعني البنت صغيرة ما بتتواخذ يمكن عمرها 12-13-14 يعني مش أكثر من هيك! بس نزلت لقيتها كاتبيتلي رسالة هون على ايد الباب! (أنا بدّي أصرّخ رح أموت) كتبتلي “أنا أكره محمد صلى الله عليه وسلّم” (لا تعليق) تطلّعت هيك بالمكتوب وفكّرت. فكرك من وين جابت هدا الحكي؟! (أنا ما رديت طبعا) آآه؟ (بردو ما رديت) قولي معي من وين؟ من المدرسة! بتعلّموا. السلط ما عي نص بالنص مسيعية ومسلمين (ما فهمت شو دخل هاد بالموضوع) معظم اللي بشتغلوا بالدير مسلمين أصلا…
بعدين لمّا طلع معي القس فرجيتو اياها، قلتلّو شوف اقرا. صار يعتذر هيك ويحكي هدا ما بصار وجهل وما بعرف شو.

واستطرد سوّاق التاكسي قائلا:بعرفوا والله بعرفوا أكثر منّي ومنّك! وجابلي قصة اليهود لمّا حكّمو النبي عليه الصلاة والسلام ورجع يأكد انهم والله بعرفوا كل شي، بعدين اليهود والنصارى بدونوا كل شي!

أنا بعقلي: ارحمني، فهمنا انك حافظ وعالم بالدين

يعني عنجد مش فاهمة، يا عمّي مش شايفني لافة وجهي على الشبّاك وكمان شوي رح أكسرو واطلّع راسي منّو عشان اهرب منّك ومن لسانك؟

وبعدين؟ ايمتا رح اطلّع سيّارة وارتاح، رح يجيني تخلّف عقلي من سوّاقين التكاسي!!