اللي بتابعوا قصصي مع تكاسي عمان يمكن لاحظوا انّو صارلي زمان ما كتبت عنها، للأسف السبب مش انو جبت سيارة ولا صاحبت واحد معو سيارة ولا تصلبطت على حدا بالشغل، بس من كتر ما مر علي صرت سبيتشلس زي ما بحكو.

يعني خدلك هالنهفة مثلا:

السواق: زمان صرلك واقفة بتستني تاكسي؟

أنا: لأ

السواق: يعني شنصك كتير حلو، سيارة مكندشة!

ملاحظة: السواق بحاول يحكي لبناني ويتناغش بس مبين عليه انه سرسري

السواق برضو: أنا على فكرة ما بطلع معي أي حدا ها! يعني بس الناس الزوق زيك!

حلوة عليك النضارة

أنا: …..

السواق: بس أنا متأكد انو عيونك كمان حلوين

بصير آخد رقمك؟

أنا: نعم؟؟

السواق: حابب آخد رقمك

أنا: ليش يعني؟!

السواق: حابب نحكي مع بعض وأتعرف عليك

أنا: ما في داعي! ما بدي أتعرف

السواق: طب خدي رقمي ازا احتجت تاكسي

أنا: برضو ما في داعي

هادا مثال على البرادة والزناخة، ولسا في النصابين وعديمي الضمير: اللي بياخد 12 دينار وهو المفروض ليرتين ازا مش ليرة ونص وبعمل حالو مش عارف، واللي بتعطي عشرين بدل ليرة وبسكت، واللي عدادو شغال قدامك وبحسب وبحكيلك لأ هادا معلق وبدك تدفعلي الفرقية، واللي بدو يدفعك زيادة عشان مشغل مكيف قال! واللي بترجاك تنزل ومستعد يدفعلك الأجرة كمان بس مشان الله انزل خليني آخدو “الخلايجة” اللي واقفين هناك!!

و بمر عليك 10 سيارات تاكسي فاضيين بس ما بدهم يحملو لانك مش محرز بالنسبة الهم. واللي ما بروح الا أماكن معينة واللي بياخد أكتر يوم الجمعة.

هدول كيف بنامو بالليل نفسي أفهم؟

وطبعا مستحيل ولا يمكن الا بالأحلام السعيدة انو يوقف التاكسي على بعد أقل من 10 متر، طب بالمرة بمشيها مشي أنا أشرفلي! مش قادرة أفهم ليش ما يرجع لورا الباشا بدل ما أنا أمشيلو!!

هيئة المواصلات العامة أخيرا قررت تتخذ اجراءات لتحل المشكلة (أو المشاكل)، بس غالبا السواقين اللي بقربوا لأي حدا واصل لو قرابة نسوان (يعني مثلا بكون ابن عم أخوها لمرة أبصر مين من ابوها ولا امها أو مرتو بتكون سلفتها لكنة ابن أخو لأبو فلان اللي من جديد تجوز أختو لأبو علان الواصل)، ما رح يتأثروا. يا رب ما أطلع مع جوزها لسلفة كنة ابن أخو لفلان اللي من جديد تجوز أختو لأبو علان الواصل